Полицаец почина за време на судирите меѓу навивачите на Атлетик Билбао и Спартак Москва пред натпреварот од Лига Европа на „Сан Мамес“ во Билбао.
Припадникот на полициската служба на Баскија наводно починал од срцев удар.
Повеќе од 500 полицајци беа ангажирани за обезбедување на натпреварот и уапсени се најмалку пет лица во немирите.
„Сочувство до колегите, роднините и пријателите на починатиот полицаец на должност“, соопшти полицијата на Билбао.
По завршувањето на натпреварот, клубот Атлетик Билбао на својот профил на Twitter напиша:
„Клубот Атлетик најостро го осудува насилтвото што се создава околу фубалските натпревари.“
На видеата од насилните судири на улиците на Билбао се гледа како навивачите се тепаат и палат огномети и други пиротехнички средства.
УЕФА исто така најостро го осуди насилството.
Судирите се случија истиот ден кога Русин, по кого имаше потерница бидејќи нападна англиски навивач за време на немирите за Европското првенство 2016 во Марсеј, беше уапсен во Минхен додека патувал кон Билбао за да го гледа натпреварот.
Шпанскиот премиер Маријано Рахој исто така изрази сочувство за починатиот полицаец и го осуди насилството.
„Сакам да изразам благодарност кон полициската служба на Баскија за нивните напори да ги заштитат оние кои знаат како да уживаат во спортот“, објави тој на Twitter.
