Полицаецот Арсим Бајрами, кој е последен од обвинетите во случајот „Дива населба“, тврди дека настаните во Куманово „се игра во којашто се вмешани и припадници на државната безбедност“ и изрази надеж дека одбраната во текот на постапката ќе може со име и презиме да ги докаже учесниците.
„Тие сакаа со мене како припадник на МВР да ги покријат своите игри, мене ме искористија како завеса за вмешаноста на припадниците на МВР“, рече Бајрами.
Неговиот адвокат додаде дека Бајрами не е полицаецот кој пукал кон свои колеги, тој дента на 9 мај бил дома, во семејната куќа во кумановското село Ваксинце, по што бил повикан да дојде на работа во полициската станица во Куманово, каде бил уапсен.
На денешното судско рочиште воведни зборови дадоа адвокатите на обвинетите и дел од обвинетите кои обелоденија дека водачите на групата, Мирсад Н’дрецај и Бег Ризај, како и уште двајца членови на групата биле убиени во полициска станица откако се предале.
Според дел од обвинетите, тие биле искористени за политички цели.
Судењето продолжува на 23 февруари, кога се очекува да бидат повикани сведоци на обвинителството.