Најмногу срцеви удари се случиле во понеделник, а декември е месец со најмногу инфаркти, покажа истражувањето на група шведски научници.
Тие ги анализирале податоците на 156.000 пациенти примени во болница по срцев удар во текот на седум години.
Во текот на истражувањето, забележале некои интересни факти во врска со тоа кога најчесто се случувале инфаркти.
Најмалку срцеви удари имало во сабота, а јули се покажал како најнеопасен месец за болните од срце.
Истражувањето покажа дека ризикот од срцев удар во понеделник е поголем за 11% во споредба со другите денови во неделата.
Младите вработени луѓе се поранливи во понеделник, за нив ризикот од срцев удар е за 20% поголем тој ден.
Времето кога се случувале срцевите удари се поклопува со високото ниво на стрес од враќањето на работа во понеделник.
Едно претходно истражување покажа дека стресот може да биде „активатор“ на промени во биолошкиот систем, што може да ги направи луѓето поподложни на срцев удар.
Како што расте нивото на стрес, така се зголемува и активноста во амигдалата, делот во мозокот одговорен за емоции.
Тоа ја поттикнува коскената срж да произведува повеќе имунолошки клетки за одбрана од стресот. Меѓутоа, зголемувањето на бројот на тие клетки предизвикува и воспаление, а тоа ги оштетува артериите и срцето.
