Непосредно пред премиерата на 28 јуни, протекоа фотографиите од новата генерација на Porsche Panamera кој според најавите на компанијата е „најбрзиот луксузен седан на Земјата“.
Новата генерација го задржува обликот на претходната генерација, но има измени во дизајнот на деталите. Фотографиите кои протекоа покажуваат нова предница и профил кој најавува поспортски дух, додека задниот дел наликува како да е инспириран од новото Porsche 718 Boxster/Cayman.
Очекувањата се дека новата генерација на Panamera која е поставена на новата MSB платформа ќе биде околу 90 килограми полесна од актуелната генерација, а придонес во тоа има и паметното користење на засилен челик, алуминиум и композитни материјали.
Во срцето на автомобилот е новиот 4.0 литарски тубо V8 мотор кој е одговорен за исполнување на ветувањето дека новата Panamera е „најбрзиот луксузен седан на Земјата“. Засега ги нема деталите за перформансите, но очекувањата се дека тие ќе го потврдуваат епитетот што компанијата веќе го најавува во тизер кампањата.