Португалската католичка црква во четвртокот објави дека финансиски ќе ги обештети жртвите на сексуално насилство во црквата, а износите ќе се одредуваат од случај до случај, потег што го критикуваа групите за заштита на жртвите.
Членовите на Португалската епископска конференција (Assembleia Plenária da Conferência Episcopal Portuguesa - CEP) се состануваат од понеделник во храмот Фатима во централна Португалија за да разговараат, меѓу другото, за прашањето за репарации.
Извештајот од февруари 2023 година на комисија финансирана од црквата заклучи дека најмалку 4.815 деца биле сексуално злоупотребувани во текот на седум децении, главно од свештеници.
Авторите на тој извештај нагласија дека овие резултати се само „врвот на ледениот брег“, а шефот на комисијата Педро Штрехт додаде дека повеќе од стотина свештеници осомничени за злоупотреба се уште се активни во црквата.
Еден месец подоцна, црквата објави серија чекори за борба против сексуалната злоупотреба, но беше критикувана бидејќи овие чекори не се сметаа за доволно силни.
Шефот на CEP, бискупот Хозе Орнелас рече дека собранието на организацијата едногласно го одобрило доделувањето на компензација, а барањата ќе се поднесуваат од јуни до декември годинава. Отштета веќе побарале 21 лице.
Комитетот потоа ќе одлучи за сумата што ќе ја добие секоја жртва, а новоформираната фондација CEP ќе биде задолжена за исплата. Сè уште се разработуваат критериумите за сумата, рече Орнелас.
Антонио Гросо, со-основач на група која ги обединува жртвите на злоупотреба од членовите на католичката црква Coracao Silenciado, го критикуваше пристапот.
„Не знам со каква мерна лента ќе се измери човечкото страдање. Луѓето ќе мора повторно да ги кажат своите приказни за да видат дали заслужуваат повеќе или помалку центи“, изјави тој за Reuters, тврдејќи дека сите жртви треба да добијат ист надомест.
