Кинески Huawei во првата половина од годината забележа двоцифрен раст на продажбата и покрај тоа што беше ставен на американската црна листа.
Првиот човек на компанијата Лијанг Ху денеска изјави дека кампањата на Вашингтон против кинескиот технолошки гигант „само го поттикна нашиот народ“.
Huawei веќе неколку месеци жестоко се бори да ја задржи високата пазарна позиција откако администрацијата на Доналд Трамп во мај ја блокираше продажбата на американските компоненти и технологија потребни за кинеската компанија, најголемиот светски производител на опрема за мобилна телефонија и втор најголем светски бренд за смартфони, по Samsung.
Продажбата претрпе извесни последици, но Huawei го избегна прекинот во испораката на смартфони, опрема за мрежите на мобилната телефонија и другите производи, изјави Лијанг Ху на прес-конференција.
Тој објасни дека Huawei оттогаш ја смени понудата на свои производи за да се обезбеди дека ќе може да ги испорача и без американските компоненти, доколку тоа се покаже за потребно.
„Притисокот на американската Влада на некој начин ни помогна подобро да ги сфатиме нашите цели. Тоа ја подобри соработката меѓу шест различни сектори на фирмата, го поттикна нашиот народ и ја засили нашата компанија“, рече Лијанг.
Во првите шест месеци од оваа година продажбата ни се зголеми за 23 отсто, на 401,3 милијарди јуани ( 8,3 милијарди долари), тврди Лијанг.
Тоа претставува раст во продажбата во однос на податоците од 2018 година кога беше забележен раст од 19,5 отсто, Но Лијанг предупредува дека Huawei „во втората половина од годината уште ќе се соочува со тешкотии во работењето“.
