Потрагата по седумгодишното дете, кое родителите го оставиле во шума како казна, сè уште трае. Повеќе од 100 волонтери и тимови за итна помош го бараат детето во близина на градот Нанае во Хокаидо, област позната по населеност со мечки, пишува британскиот Telegraph.
Родителите признале дека го оставиле детето само во шумата за да го казнат бидејќи фрлало камчиња во реката, пренесува AP. Момчето не е видено од саботата, откако родителите го исфрлиле од автомобилот и го оставиле само во планинскиот дел на Хокаидо, во област каде претежно живеат мечки.
Инаку, тие првин изјавиле дека детето се загубило додека барале шумски плодови, а подоцна признале дека го оставиле за да го казнат, но тој исчезнал кога се вратиле по него. Таткото, 44-годишниот Такајуки Таника изјавил дека неговиот син фрлал камчиња од автомобилот и како казна, тој и сопругата го исфрлиле од автомобилот и продолжиле да возат. По кратко време го запреле возилото и се вратиле назад, но момчето никаде го немало. За пет минути тоа исчезнало.
Не е познато дали родителите ќе се соочат со евентуални обвинувања за негрижа.
