Куманово, 30 октомври 2019 (МИА) – Десет работници се повредени при изведување на градежни активности на локација на улиците „Васко Карангелевски“ и „АВНОЈ“ во Куманово, информираат денеска од Општата болница Куманово, а случајот го потврди и СВР Куманово.
Повредените работници се префрлени во кумановскиот Ургентен центар и од нив двајца, според директорката на болницата Снежана Захариева, се префрлени на Ургентен центар на скопските клиники.
-На останатите работници им се пружа помош во кумановската Општа болница. Се вршат испитувања и нивната здрвствена состојба и понатаму ќе се следи, изјави директорката Захариева.
Од десетте повредени градежни работници во Куманово, двајца се во критична состојба и веднаш се префрлени во Ургентниот хируршки центар во Скопје, други двајца се здобиле со тешки повреди, но не се во животно-загрзозувачка состојба, а останатите се стабилни и се задржани во кумановската болница, информираа надлежните од болницата.
Работниците се повредиле додека извршувале градежни активности претпладнево на локација на улиците „Васко Карангелевски“ и „Авној“ во Куманово, во населбата „Зелен Рид“ додека изведувале градежни активности помеѓу мрежи од арматури.
Претходно, директорката на болницата, Снежана Захариева, информираше дека двајцата потешко повредени веднаш по прегледите на кумановскиот ургентен центар, со комплетна медицинска екипа се префрлени во Скопје, а останатите беа задржани во кумановската болница каде им се пружаше помош.
Случајот го потврдија од СВР Куманово и нивни екипи вршат увид на местото на несреќата, како и од обвинителството од каде велат дека локацијата е обезбедена и се прибираат и вештачат траги кои можат да помогнат за утврдување на причините за несреќата.
Од СВР Куманово потврдија дека кај нив е пријавен случај дека има повредени градежни работници и информираа дека екипите се на терен и вршат увид.
