Двајца играчи на Реал Мадрид и по еден играч на Манчестер Сити, Ливерпул и ПСЖ се во првата петорка играчи номинирани за престижната Златна топка, која му се доделува на играчот кој се покажал како најдобар во изминатата натпреварувачка сезона.
Единсон Кавани доби потврда за добрата сезона со нова номинација за Златната топка.
До крајот на денот ќе бидат објавени вкупно 30 играчи кои се номинирани за наградата за најдобар фудбалер во светот според France Football, а помеѓу првите пет откриени имиња се најдоа тројца напаѓачи, еден крилен играч и еден голман.
Голманот на Ливерпул, Алисон Бекер, ја предводи листата на номинирани играчи, а на него му се придружија уште Герет Бејл, Карим Бензема, Серхио Агуеро и Единсон Кавани. За Алисон ова е прва номинација за оваа награда, која ја заслужи со неговите одлични партии помеѓу стативите на Рома во минатата сезона и Ливерпул во оваа сезона.
Во главната конкуренција за наградата се Лионел Меси, Лука Модриќ, Антоан Гризман, Килијан Мбапе и Кристијано Роналдо, кои беа најдобрите индивидуалци минатата сезона и сигурно ќе бидат помеѓу номинираните.