Откако Дени Бојл ја напушти режисерската позиција во новиот филм за Џејмс Бонд, студиото мораше да одлучи кој ќе биде новиот режисер на филмот. Тие се одлучија за Кери Џоџи Фукунага, кој во моментов работи на сценариото и размислува за ангажирање на една од најновите ѕвезди на филмското платно за улогата на главен негативец во филмот.
Даниел Крег, Леа Сејду, Ралф Фајнс, Бен Виншо и Наоми Херис се враќаат во нивните улоги, но студиото и режисерот треба да направат избор за главниот негативец кој ќе му се спротистави на Џејмс Бонд, бидејќи Кристофер Волц веројатно нема да ја репризира неговата улога како Блофелд.
Иако ништо не е потврдено и во моментов се работи само за шпекулации, сепак британските медиуми пишуваат дека Фукунага сака да го ангажира Рами Малек за улогата на новиот негативец.
Variety тврди дека заминување на Дени Бојл се должи токму на разликите помеѓу него и студиото во однос на кастингот за главниот негативец во „James Bond 25“. Бојл инсистирал дека го сака данскиот актер Клаес Банг, кој стана популарен по улогата во филмот „The Square“, но студиото не дозволило бидејќи сметале дека Данецот не е доволно популарен за улогата.
Последните две години Рами Малек го живее холивудскиот сон. Откако се појави во серијата „Mr. Robot“, тој стана позната фигура во актерските кругови, што му дозволи да биде најмен за улогата на Фреди Меркјури во биографскиот филм „Bohemian Rhapsody“, кој е вистински хит во киносалите низ светот.