Регион

Православната црква во Црна Гора за прв пат крсти трансродово лице

4. ноември 2019 - 16:52 | А.С.

Во Соборниот храм Христово воскресение во Подгорица, Црна Гора беше изведено првото крштавање на трансродово лице и тоа со благослов од митрополитот Амфилохије.

Бојана Јокиќ, претседателката на ЛГБТ форумот Прогрес, за Standrad изјави дека станува збор за Вук, транс момче кое уште ја нема завршено целосната транзиција.

„Многу сум среќна што мојот драг пријател Вук се крсти. Со благослов од митрополитот Амфилохије, Црногорско-приморската митрополија на Православната црква му покажа отворени раце. На Вук во крштеницата му стои името кое сам си го избра, а не она кое му е доделено по раѓањето“, изјави Јокиќ.

Таа потсети дека во Црна Гора не е дозволено да се промени името и полот во официјални документи додека не се комплетираат сите фази од процеддурата да се прилагоди полот на родот на лицето.

„Од хормонска терапија, со сите придружни операции. Главниот процес на транзиција е ‘долната операција’. Таа уште важи за  круцијална во поимањето на промената на полот“, објаснува Јокиќ.

Првото крштавање на трансродово лице во Црна Гора е историски настан, особено кога ќе се земе предвид фактот дека процесот на потврда на идентитетот на трансродовите лица може да трае со години во Црна Гора,  и покрај тежнеењето на земјата кон евроатлантските интеграции.

Јокиќ вели дека Митрополијата со овој симболичен чекор направила неверојатно прогресивен чекор кон прифаќање и потврда на идентитетот на оние кои се „најзагрозени во ЛГБТ заедницата“.

Коментирај