Работните групи на политичките партии ќе ги продолжат преговорите за излегувањето од кризата во резиденцијата на амбасадорот на САД во Скопје, а на маса останува прашањето околу надлежностите на министерот за внатрешни работи во преодната влада.
Минатата недела се покажа дека ова прашање е каменот на сопнување во преговорите за излегувањето од политичката криза и одредувањето на датум за предвремени парламентарни избори, при што од СДСМ инсистираат министерот за внатрешни работи да има целосни ингеренции во кадровската политика и да се вратат старите решенија, додека пак за владејчката ВМРО- ДПМНЕ овие измени ќе ја спречат партизацијата на министерството.
Генералниот секретар на најголемата опозициска партија и поранешен технички министер за внатрешни работи Оливер Спасовски генерал во саботата одговарајќи на новинарско прашање потврди и порача дека СДСМ цврсто стои на ставот дека идниот министер за внатрешни работи во техничката влада мора да ги има сите ингеренции кои се одземени откако претходно седмицава беа изгласани промени на Законот за внатрешни работи и за полицијата, со кои сите надлежности му се одземаат на министерот во предизборниот период.
