Преговорите на претставниците на политичките партии потписнички на Пржинскиот договор ќе продолжат и денеска, со интересна идеја на маса.
Преговорите треба да го дадат одговорот на единственото преостанато спорно прашање – ингеренциите на министерот за внатрешни работи во преодната влада што треба да ги организира изборите и дали тој министер треба да се повлече веднаш по денот на изборите.
Вчера вечер, по разговорите во резиденцијата на американскиот амбасадор, претставниците на партиите не дадоа изјави, а Бејли рече дека има интересна идеја и се надева дека договор ќе се постигне до крајот на неделава.
„Не можам да ви соопштам дека постигнавме договор, но може да ви кажам дека имавме интересна нова идеја на маса“, изјави амбасадорот Бејли.
Тој ја повторни минатонеделната изјава дека „овој договор е многу важен за земјата, за вашите пријатели, за Европската Унија и за САД и ние сакаме да ги дадеме сите можности за да бидеме сигурни дека ќе го најдеме патот кон напредокот“.
На средбата присуствуваа Никола Тодоров од ВМРО-ДПМНЕ, Радмила Шекеринска од СДСМ, Артан Груби од ДУИ и Имер Алиу од ДПА. Посредници на преговорите се американскиот амбасадор Џес Бејли и заменикот на евроамбасадорот Аиво Орав, кој е на дополнителни консултации во Брисел.