Лондон, 18 октомври 2019 (МИА) – Раководството на Премиер лигата создаде тим од поранешни и актуелни играчи за борба против расизмот.
Последниве денови, оваа тема беше особено важна на Островот заради испадите на група фанови за време на натпреварот меѓу Бугарија и Англија во понеделникот (0:6). Средбата на националниот стадион „Васил Левски“ во Софија беше прекината двапати од главниот судија поради расистички скандирања од трибините насочени кон црномурните играчи на гостите.
Премиер лигата формираше таканаречена советодавна група BAME (Black, Asian, and Minority ethnic) – црни, азиски и етнички малцинства.
Во оваа група, предводена од менаџерот на Донкастер Роверс, Дарен Мур, се вклучени и Вес Морган, Рахим Стерлинг, Тами Ејбрахам, Трент Александер-Арнолд, Сон Хјон-мин, Тееми Пуки, Џордан Пикфорд, Калум Вилсон, Ијан Рајт, Џулијан Лескот и Шола Амеоби. Овие реномирани личности ќе ги советуваат фудбалските власти, а ќе бидат прикажани и во реклами во рамките на кампањата „No Room For Racism“.
Дисциплинскиот одбор на УЕФА ќе го разгледа случајот против Бугарија на 28 октомври. Бидејќи ова не е прво обвинување против Бугарија за расизам и поради големиот меѓународен фидбек, казната од УЕФА се очекува да биде доста тешка. Додатен проблем за Бугарија се и нацистичките испади присутни за време на истиот натпревар.