Изгледа дека проблемите во соблекувалната на Баерн Минхен не престанаа, туку само се стивнаа во изминатите два месеци. Денеска, на еден ден пред дуелот против Ливерпул во рамките на Лигата на шампионите, германските медиуми пишуваат за нов скандал и нова кавга помеѓу две клучни фигури во тимот.
Нико Ковач никако да здивне – уште од првиот ден кога почна со работа во Баерн Минхен, играчите не покажаа никаков знак на поддршка кон Хрватот.
Непосредно пред натпреварот против Аугсбург, Тијаго Алкантара вербално го нападнал Нико Ковач пред сите играчи во соблекувалната, а според пишувањата на германскиот весник Bild, покус не останал ниту Ковач. Целата оваа ситуација резултираше во ново незадоволство во составот на Баерн, а Тијаго Алкантара беше заменет во 82-та минута од натпреварот против Аугсбург, иако играше прилично добро.
А проблемите продолжија и по натпреварот, кога резервите Франк Рибери, Хави Мартинез, Ренато Санчес, Рафиња и Алфонсо Дејвис искажаа незадоволство поради тоа што Нико Ковач го оставил неговиот брат Роберт да го води тренингот. Тие се пожалија дека не им била дадена шанса да се наметнат за место во составот во пресрет на мечот против Ливерпул, а веќе денеска беше објавено дека Рибери и Џером Боатенг нема да бидат во составот за овој осминафинален дуел.
Bild истакнува дека играчите не го сфаќаат Ковач сериозно, најмногу поради тоа што тој „ги крши своите правила“. На последниот тренинг пред натпреварот против Штутгарт, Ковач задоцнил десетина минути, откако претходниот ден им рекол на сите играчи дека доцнењето нема да се толерира
Ситуацијата и понатаму останува без разврска, бидејќи раководството на Баерн Минхен има доверба во Нико Ковач, барем засега. Но, тешко е да се претпостави дека Ковач ќе остане на чело на тимот и во следната сезона, посебно не ако Баерн сака да ги задржи среќни главните играчи.