Меѓународен тим истражувачи во шумите во Литванија мапираше тунел ископан од еврејските заробеници кои се обидувале да избегаат од нацистите, пишува Guardian.
Луѓето го копале тунелот со лажици, успеале да ископаат 34 метри долг тунел во шумата Понар, место каде во периодот од 1941 година до 1944 година нацистите убиле околу 100.000 луѓе, вклучително и 70.000 Евреи. Пред крајот на Втората светска војна биле доведени заробеници од концентрационен логор од Полска кои биле принудени да ги палат телата. Тие тајно го копале тунелот во јамата каде биле држани. Околу 40 успеале да побегнат низ тунелот во 1944 година. Многумина биле убиени и ранети, но 11 од нив избегале во шумата, им се придружиле на партизаните и ја преживеале војната.
Ова го дознаваме благодарение на откритието на меѓународен тим истражувачи составен од археолози, геофизичари и историчари од Израел, САД, Канада и Литванија. Со помош на специјална, рударска технологија за скенирање на земја тие успеале да го мапираат тунелот.