Просечната месечна исплатена нето-плата по вработен во јуни изнесувала 22.187 денари, или за 0,7 отсто повеќе во однос на платата во јуни минатата 2015 година, а во јуни годинава 1,6 отсто од вработените во земјата не примиле плата, објави Државниот завод за статистика (ДЗС).
Според ДЗС, ваквото зголемување, во прв ред, се должи на зголемувањето на просечната месечна исплатена нето-плата по вработен во секторите: градежништво - 10,6 отсто, административни и помошни услужни дејности - 6,3 проценти, и во секторот земјоделство, шумарство и рибарство од 6,3 отсто.
Намалување на просечната месечна исплатена нето-плата по вработен, во однос на претходниот месец, е забележано во секторите: трговија на големо и трговија на мало, поправка на моторни возила и мотоцикли, и тоа од 4,4 отсто, објекти за сместување и сервисни дејности со храна од 3,7 отсто, и стручни, научни и технички дејности од 3,4 отсто.
Според ДЗС, просечната месечна исплатена бруто-плата по вработен во јуни годинава изнесува 32.637 денари.
