Најпопуларната акциона камера, GoPro, допрва треба да го претстави својот најнов модел, Hero 5. Пред извесно време на интернет се појави видео од наводниот изглед на менито на камерата, а сега протекоа фотки и дел од упатството на камерата.
Малата моќна камера генерално ќе има сличен дизајн како претходниот модел, освен предното копче што гледаме дека недостасува на протечените фотографии, објавени од јапонскиот блог Nokishita. Но ако им веруваме на видеото и на овие фотографии, најверојатно GoPro Hero 5 ќе има екран на допир, преку кој ќе се одвива навигацијата низ менито, па повеќе нема потреба од ова копче.
Сменет е и познатиот сребрено-црн финиш на уредот, со целосно мат црн изглед. Исто така, изгледа дека GoPro Hero 5 ќе биде водоотпорен и без куќиштето.
Според наводното протечено упатство, GoPro Hero 5 ќе фотографира и снима со истите резолуции како и претходниот модел, со тоа што новитет е опцијата за стабилизирање на слика, што одамна се очекуваше од оваа камера.
Вкучен е и GPS, опција за гласовни команди и мало подобрување на батеријата.
