Пред седиштето на ЕВН во Дебар се одржаа протести во организација на невладината организација „Еден долар за Дебар“, на кои е побарано од ЕВН во рок од десет дена да ги земе предвид барањата што се изнесени на овој протест.
Во барањата доставени до ЕВН и другите надлежни институции во земјава, покрај другото се – отстранување од сметките 33 отсто, потоа да нема наплата за потрошувачите при давање на приклучок до мерилото за електрична енергија, издавање бесплатно мерачи за електрична енергија, почитување на законот за исплата на заостанатите долгови, намалување на цената на електричната енергија во согласност со стандардите во Македонија, новите трафостаници да се градаат со средства на ЕВН, а не да ги плаќаат граѓаните, решавање на проблемите со социјално загрозените потрошувачи, редовно да има стабилна електрична енергија за да нема штети врз електричните апарати, да нема паушални сметки и вработените во ЕВН да имаат обврска да ги информираат потрошувачите за нивото на потрошена електрична енергија.
Исто така на протестот е побарано албанскиот јазик да има приоритет во комуникацијата со потрошувачите во Дебар, вработените на шалтерот на ЕВН во Дебар добро да го познаваат албанскиот јазик, да има повеќе вработени во шалтерот за да нема редици на чекање, како и други барања поврзани со работата на ЕВН.
На мирниот протест, одредени граѓани побараа покрај за ЕВН да се протестира и против Хидроцентралата „Шпилје“ и ЕЛЕМ поради тоа што, како што беше речено таму, не се вработуваат дебарчани туку други и покрај тоа што Дебарското Езеро ги покри со акумулацијата најбогатите дебарски полиња.