Вчера биле приведени 217 учесници на протестите во Вашингтон поврзани со инаугурацијата на претседателот Доналд Трамп. Во безредијата се повредени шест полициски службеници, соопштија властите.
„Лицата кои го нарушуваа јавниот ред учествувајќи во инциденти, беа уапсени, а се соочуваат со обвиненија за предизвикување на немирите“, изјави на прес-конференција началникот на полицискиот оддел на Вашингтон, Питер Њушем.
Додаде дека во справувањето со нарушителите на редот, со повреди се здобиле шест полицајци.
„Вкупно приведовме 217 лица, во моментов ни е познато за шест службеници на градската полициска управа кои се здобиле со повреди“, дополни Њушем прецизирајќи дека тројца полицајци се повредени во пределот на главата од предмети кои кон нив ги фрлале демонстрантите, како и дека сите повреди се сметаат за лесни.
Во текот на денот група од околу 500 маскирани лица неколкупати се судри со полицијата. Вооружени со чекани и метални шипки лицата кршеле излози на канцелариите на познатите американски компании и палеле луксузни лимузини во центарот на Вашингтон.