Во време кога лаптопите стануваат потенки, полесни и помоќни, навистина е тешко било која од компаниите да понуди нешто ново и свежо, со што ќе се докаже на пазарот. Меѓутоа, компанијата HP има ас во ракавот и со моделот Omen X 2S ни нуди нешто многу поразлично.
Omen X 2S е гејмерски лаптоп кој е прв на пазарот што има не еден, туку два екрани.
Примарниот екран има дијагонала од 15 инчи и резолуција од 1080p со фреквенција на освежување од 144 Hz (опционално 240 Hz или 4К), што го прави прилично стандарден екран како за врвен гејминг лаптоп. Но, адутото на HP е во вториот 6-инчен екран со резолуција од 1080р и е позициониран над тастатурата.
Преку вториот екран корисникот може да гледа видеа, да ги следи перформансите на лаптопот или да „четува“ на Twitch додека игра. Исто така, на помалиот екран ќе може да се прикажуваат делови од главниот екран, за корисникот да има подобар преглед на ситуацијата.
Лаптопот има процесор Intel Core-i9 со осум јадра, графичка картичка NVIDIA GeForce RTX 2080 Max-Q, 32GB RAM и опционална Intel Optane меморија. Покрај тоа, тој доаѓа со систем за ладење во пет насоки, како и термална паста од течен метал, која е десет пати повеќе спроводлива во однос на силиконската паста.
Дебелината на лаптопот изнесува вкупно 20 милиметри, допрва треба да дознаеме колку тежи и колкав е капацитетот на неговата батерија. Основниот модел на Omen X 2S чини 2.100 долари, а цената расте до 2.700 долари за најсилната верзија.
