Русија останува во борбена готовност и е целосно подготвена за нуклеарна војна, но не брза да го стори тоа во моментов, изјави вчера рускиот претседател Владимир Путин.
Во интервју за државните медиуми, Путин, кој започна сеопфатна инвазија на Украина и речиси сигурно ќе победи на претседателските избори на 15-17 март, рече дека Русија ќе биде подготвена да употреби нуклеарно оружје доколку нејзиниот суверенитет биде загрозен.
„Од воено-техничка гледна точка, се разбира, ние сме подготвени“, изјави Путин за телевизијата „Русија-1“ и за новинската агенција РИА, на прашањето дали земјата е навистина подготвена за нуклеарна војна.
Тој рече дека САД разбираат дека ако Русија распореди американски војници на руска територија или во Украина, тој чекор ќе се третира како интервенција.
„(Во САД) има доволно експерти во областа на руско-американските односи и во областа на стратешкото одвраќање. Затоа, не мислам дека сите овде брзаат кон тоа (нуклеарен конфликт), но ние сме подготвени за тоа“, рече Путин.
Тој повтори дека употребата на нуклеарно оружје е наведено во нуклеарната доктрина на Кремљ, чија политика ги утврдува околностите под кои Русија би можела да го користи своето оружје.
„Оружјето постои за да се користи. Ние имаме свои принципи“, рече тој.
Доколку САД извршат нуклеарни тестови, Русија би можела да го стори истото, додаде тој во долгото интервју.
„Не е потребно... сè уште треба да размислуваме за тоа, но не исклучувам дека можеме да го сториме истото“, изјави тој.
Но, Путин рече дека Русија никогаш не се соочила со потребата да користи нуклеарно оружје во Украина, каде конфликтот беснее од февруари 2022 година.
„Зошто треба да користиме оружје за масовно уништување? Таква потреба никогаш немало“, посочи тој.
Рускиот претседател во интервјуто изјави и дека Русија не се меша во никакви избори и дека ќе соработува со кој било избран лидер на САД.
„Ние на ниту еден начин не се мешаме во никакви избори. И, како што многупати реков, ќе работиме со секој лидер на кој му верува американскиот народ, американскиот гласач“, додаде тој. Тој исто така изјави дека, кога бил претседател, Доналд Трамп го искарал дека „сочувствувал“ со актуелниот претседател Џо Бајден.
Путин исто така изјави дека влезот на Финска и Шведска во НАТО е „бесмислен чекор“ и дека Русија ќе распореди војници и системи за уништување на финската граница откако Финска ќе се приклучи на алијансата.
„Ова е апсолутно бесмислен чекор (за Финска и Шведска) од гледна точка на обезбедување на нивните национални интереси. Ние немавме војници таму (на финската граница), сега тие ќе бидат таму. Немаше систем за уништување таму, сега ќе се појават“, заклучи тој.
