Еден од најголемите кинески производители на пиво објави дека менаџментот отворил истрага откако оваа недела се појави видео на вработен во фабриката како уринира врз суровини.
На видеото објавено на интернет во четвртокот наводно се гледа работник во складиштето на пиварницата Tsingtao (Цинтао) додека се качува на контејнер со високи странични ѕидови и уринира во неговата содржина.
Клипот кружеше на кинеските социјални мрежи и собра десетици милиони прегледи на популарната платформа Weibo.
Компанијата Tsingtao вчера соопшти дека контактирале со полицијата за инцидентот и дека истрагата е во тек. „Нашата компанија му придава големо значење на видеото кое излезе од пиварницата Tsingtao бр. 19 на 19 октомври“, се вели во соопштението на производителот на пиво.
„Го пријавивме инцидентот во полиција штом можевме, а во истрагата беа вклучени и органите за јавна безбедност“, се додава.
„Во моментов, предметната серија слад е целосно запечатена. Компанијата продолжува да го следи процесот на управување во обид да го обезбеди квалитетот на производот.
Многу корисници на социјалните мрежи луто реагираа на видеото и изразија поддршка за еден од најпознатите кинески брендови за пијалаци.
„Предлагам компанијата да го одведе овој човек на суд и да го натера да плати отштета за штетата“, напишал еден корисник на Weibo, а некои ја искористија можноста да се потсмеваат на познатиот пијалак.
„Отсекогаш сум велел дека пивото овде е како коњска мочка. Излезе дека згрешив“, коментираше еден од нив, додека друг напиша: „Фала, мислам дека отсега ќе пијам вино наместо пиво“.
Tsingtao е втората по големина кинеска пиварница и добро стои на берзата во Хонгконг, а бројните барови низ Источна Азија обично ги полнат своите фрижидери со овој вид пиво.
Во последниве години, компанијата се обидува да се прилагоди на вкусовите на помладите кинески потрошувачи преку промени во производството на крафт пиво и други производи.
