Македонските ракометари ја забележаа првата победа на ракометниот мундијал откако попладнево во тешка и израмнета битка го совладаа Чиле.
Само победа ја вадеше Мкаедонија денеска бидејќи и со нерешено, поради послаба гол-разлика, чилеанската репрезентација ќе се пласираше во втората фаза.
Првиот дел им припадна на Чилеанците кои најчесто водеа, но најмногу со два гола разлика, додека македонските ракометари израмнуваа и се обидуваа да поведат, нешто што им успеа во три наврати. На полувреме Чиле замина со предност од 17:16.
Уште на почетокот од вториот дел израмнивме, па победовме, разлика која ја одржувавме до крај. Едно време дојдовме и до +4 разлика (27:23), а на крајот Македонија триумфираше со 32:29.
Најефикасен во нашиот табор беше 40-годишниот Кире Лазаров кој постигна 8 голови и беше прпгласен за играч на натпреварот. Кај Чилеанците исто толку голови постигна Салинас.
Табела:
- Шведска 4 (73:46)
- Египет 4 (73:48)
- Македонија 2 (71:99)
- Чиле 0 (84:108)
Од 18 часот Египет и Шведска во директен дуел ќе одлучат кој ќе биде првопласиран.
Во втората фаза ќе играме во групата IV заедно со репрезентациите од Х групата каде сигурни патници се Белорусија, Русија и Словенија. Првиот натпревар ќе го играме веќе в среда, а противникот допрва ќе биде одреден согласно конечниот пласман.
