Во 28 земји во Европа се уапсени вкупно 75 лица кои се осомничени за вмешаност во дистрибуција на детска порнографија на интернет, соопшти Европол.
Операцијата под кодно име „Дејлајт“ започнала откако биле добиени информации од Швајцарија за голема мрежа на криминалци кои дистрибуирале снимки од сексуално искористување на малолетници.
„Истрагата траеше подолго од една годна“, изјави вчера за AFP портпаролката на Европол, Клер Жорж, додавајќи дека потоа информациите за осомничените се проследени во 26 земји ширум Европа, меѓу кои Норвешка и во Шведска.
Уапсените се претежно лица над 50-годишна возраст, додека жртвите се на различни возрасти, но забележително е дека се сé почести случаите на сексуално злоставување на деца помлади од 18 месеци.
Италијанската полиција во одделно соопштение информираше дека уапсените лица биле потполно непознати за полицијата и „надвор од секакви сомневања“.
Истрагата е сé уште во тека и може да се очекуваат нови апсења ширум Европа, додаваат од Европол.