Фудбалерите на Реал и Манчестер Сити вечерва ќе го одиграат полуфиналниот реванш, по кој ќе биде познат противникот на Атлетико Мадрид, во финалето на Лигата на шампионите.
Реваншот во Мадрид помеѓу Реал и Манчестер Сити ќе започне со резултат 0:0, откако двата тима пред осум дена во Манчестер не успеаја да постигнат гол.
„Кралскиот клуб“, кој е десеткратен освојувач на Лигата на шампионите, рекорден 27-ми пат се наоѓа меѓу најдобрите четири тимови во Европа. Реал на претходните 26 учества во полуфиналето има половичен учинок, односно 13 пати успеал да мине во финалето.
Манчестер Сити оваа сезона го постигна најголемиот успех во клупската историја, откако преку ПСЖ се избори за своето прво полуфинале во Лигата на шампионите.
Во пресрет на дуелот двајцата тренери се соочуваат со кадровски проблеми. Зинедин Зидан тимот на Реал ќе го составува без повредените Бензема и Каземиро, но она што го радува е веста дека Роналдо е подготвен. Португалецот поради повреда го пропушти првиот дуел на Етихад.
„Кристијано е 100 отсто подготвен. Нема никаков ризик, нормално тренира. Што се однесува до натпреварот ќе биде вистинска катастрофа доколку не се пласираме во финалето. Овој меч ќе биде многу поразличен од првиот, Сити има одлични играчи, особено во нападот, а ние како и секогаш ќе се обидеме да ја играме нашата игра. Не можеме да кажеме дека ќе постигнеме два или три гола во првите 15 минути, но знам дека ќе напаѓаме сите. Мораме да бидеме трпеливи и да играме тимски“, рекол Зидан.
Менаџерот на Сити, Мануел Пелегрини, тимот ќе го составува без Давид Силва и Пабло Забалета, а под голем знак прашалник е настапот на Јаја Туре иако тој допатувал со тимот во Мадрид.
„Наша цел е да се пласираме онаму каде што не сме биле никогаш во клупската историја. Секогаш е добро кога ќе се вратите на Сaнтијаго Бернабеу, тука ме врзуваат убави спомени. голем е притисокот кога играте тука, но ние имаме карактер и екипа која може да победи во Мадрид. Исто така имаме можност да испишеме нова страница во клупската историја. Ќе се обидеме да го контролираме поседот на топката и да нападнеме од првата минута. Реал не е само Кристијано, ќе мора да играме против сите од првата до последната минута“, рекол Пелегрини, кој дел од кариерата мина како тренер на Реал.
Подобриот од овој дуел ќе му се спротивстави на Атлетико Мадрид во финалето кое ќе се одигра на 28 мај во Милано.
