Активист кој се залага за заштита на изолираните домородни народи во Амазонија објави снимка од член на изолираното племе Ава во Бразил и порача дека порастот на уништувањето на амазонските шуми се заканува на начинот на живот на домородните племиња.
Снимката е направена во прашума во Маранхао и покажува човек како држи нож и ја подига острицата до лицето пред да го забележи човекот кој го снима.
„Луѓето од племето Ава немаат контакт со никого и се прогонувани повеќе од 500 години. Иако живеат во близина никогаш не сме имале никаков контакт со нив. Секогаш сме знаеле дека се тука, среде големата шума“, вели Флај Гујхахара.
Додека некои членови на ова изолирано племе успеале да остварат контакт со надворешниот свет, но многумина сè уште живеат во изолирани подрачја на прашумата на која сега ѝ се заканува опасност од сечење дрвја.
Гујхахара објаснува дека членовите од неговото племе се организирани да го заштитат изолираното племе.
„Загрижени сме за идните генерации и за изолираните племиња кои никогаш не сме ги виделе, а за кои сме слушале од бабите и дедовците. Ни кажаа дека ним им е потребна нашата заштита и нивната шума“, вели Гујхахара. Тој додава дека уништувањето на Амазонија е реалност и дека последиците се многу сериозни за сите.