Фиорентина загуби дома од Лацио, а по последниот свиреж на сцена стапи Франк Рибери кој го нападна помошниот судија поради што го чека драстична казна.
За било каков напад врз судија казните се драконски. Токму таква го чека најголемото летно засилување на Фиорентина, Французинот Франк Рибери. Тој веројатно ќе добие максимална казна, односно суспензија од 4 натпревари.
По завршувањето на натпреварот Рибери влета на теренот и го буткаше помошникот судија Лука Пасери. И тоа не еднаш, туку двапати. Сакаше да продолжи, но за негова среќа го спречија во намерата. Без разлика што натпреварот беше завршен, потоа судијата поради однесувањето му додели директен црвен картон.
Бесот на Французинот беше поради тоа што на победничкиот гол на Чиро Имобиле му претходеше фаул на Џордан Лукаку над Рикардо Сотил кој ниту главниот судија Марко Гуида не го досуди, ниту пак реагираа од ВАР собата.