Британската компанија Rolls-Royce денеска соопшти дека успешно тестирал авионски мотор на водород за прв пат во светот на воздухопловството, што е важен чекор кон декарбонизација на воздушниот транспорт.
Тестирањето на земја, со помош на модифициран мотор AE 2100-A, беше изведено со „зелен“ водород произведен со употреба на енергија од ветер и бранови, соопшти британската компанија.
Rolls-Royce и нејзиниот партнер за тестирање easyJet се обидуваат да докажат дека водородот може да биде безбедно и ефикасно гориво за цивилни авиони.
Тие веќе планираат втор сет тестови, а долгорочно сакаат да извршат тестови во воздух.
Водородот е една од технологиите што би можеле да ѝ овозможат на воздухопловната индустрија да биде јаглеродно неутрална до 2050 година.
Airbus соработува со француско-американскиот производител на мотори CFM International за тестирање на технологијата за користење на водород како погонско гориво за авиони.
Во февруари ги објави плановите за инсталирање на специјално адаптирана верзија на моторот од сегашната генерација во близина на задниот дел на тест авионот А380 superjumbo.
Но, Европската Унија во 2021 година ѝ порача дека повеќето авиони ќе се потпираат на традиционалните мотори барем до 2050 година.
Преминот кон водородни мотори ќе бара целосно нов дизајн на авионската и аеродромската инфраструктура.
Ерик Шулц, управен директор на SHZ Consulting, во јули изјави дека промените во дизајнот се толку обемни што ќе бидат потребни повеќе од една генерација авиони за да се постигнат.
Други технологии поддржани од компании како Rolls-Royce вклучуваат електрични мотори, кои првично би биле погодни за летови на кратки релации, и одржливо воздухопловно гориво.
Моторите што веќе се користат можат да користат мешавина од одржливо и конвенционално гориво, но досега се произведува многу малку.
Може да се произведе со комбинирање на јаглеродот заробен од воздухот со зелен водород, но тој процес бара многу енергија и сè уште не е лесно достапен.
