Синоќа на „Олд Трафорд“ Манчестер Јунајтед го победи Ливерпул со 2:1 во најголемото англиско дерби, а пред натпреварот сите на малите екрани можеа да видат колкава нетрпеливост постои меѓу овие клубови.
За време на загревањето пред натпреварот, Кристијано Роналдо дојде да се поздрави со екипата кој го правеше директниот ТВ пренос за Sky Sport.
„Главната фаца е тука вечерва“, изјави водителот на Sky Sport, Дејв Џонс, додека се приближуваше Роналдо.
На теренот Џонс беше придружуван од легендите на Манчестер Јунајтед, Рој Кин и Гари Невил, како и легендата на Ливерпул, Џејми Карагер.
Роналдо му пријде на Невил и срдечно го поздрави, а потоа и Карагер се обиде да се поздрави со напаѓачот на Јунајтед, но Португалецот го игнорираше и помина покрај него, пружајќи му ја раката на Кин.
Откако Роналдо се врати на загревањето, Џонс се пошегува со Карагер и рече дека „има интересен муабет“ со Кристијано, а легендарниот дефанзивец на „Црвените“ малку тажно рече: „Целосно ме игнорираше“.
За овој потег на Роналдо денеска повеќе се зборува отколку за неговата игра на теренот. Ништо чудно, бидејќи Португалецот влезе во игра дури во 86. минута и само седум пати ја допре топката, па многу корисници на Twitter го опишаа потегот за понижување на Карагер како „неговото најдоброто од натпреварот“.
