Рускиот надзорен орган за комуникации најави дека се отворени правни постапки против Twitter и Facebook поради тоа што работењето на овие две социјални мрежи не е во согласност со домашните закони за заштита на податоци.
Надзорниот одбор, наречен Роскомнадзор, преку официјално соопштение наведе дека Facebook и Twitter не објасниле како и кога ќе го применат законот кој вели дека сите сервери кои се користат за складирање на личните податоци на корисниците мора да бидат сместени во Русија.
Александар Захаров, кој е претседател на овој орган, изјави дека компаниите имаат рок од еден месец за да ги достават бараните информации. Во спротивно, против нив ќе бидат преземени неопходни акции.
Во последните пет години Русија воведе многу построги закони за интернетот, кои бараат од пребарувачите да избришат одредени резултати од пребарувањата, сервисите за размена на пораки треба да ги споделат лозинките за шифрирање со службите за безбедност, а социјалните мрежи мораат да ги чуваат податоците за корисниците во сервери сместени во Русија.
Единствените казни кои Русија во моментов може да ги примени се парични, кои стигнуваат до неколку илјади долари, што воопшто не е проблем за големи компании како Twitter и Facebook. Но, во текот на оваа година се планирани неколку измени на законите кои би ѝ дозволиле на Русија поголема ригорозност околу казнувањето.