Русија е прв полуфиналист, победи денеска остварија и ракометарките на Шпанија и Шведска, додека домаќините доживеаја елиминација.
Ракометарките на Русија ја забележаа седмата победа од 7 натпревари на Мундијалот во Јапонија продолжувајќи немилосрдно да итаат кон титулата.
Денеска со 7 разлика ја средија репрезентацијата на Црна Гора која ги загуби шансите за пласман во полуфиналето. Јулија Манагарова со 12 и Јарослава Фролова со 10 голови беа незапирливи за Црногорките кај кои поранешната вардарка Јованка Радичевиќ се истакна со 8 погодоци.
Русија - Црна Гора 35:28
Домаќинот Јапонија пружи силен отпор против Шпанија, но на крајот сепак загуби. Јапонките не успеаја да дојдат ниту до шанса да се борат за петтото место за што им беше потребна победа денес. Шпанките со овие два бода во последното коло треба само да не загубат од моќната Русија за да продолжат во полуфиналето.
Јапонија - Шпанија 31:33
Швеѓанките со 12 разлика си поиграа со немоќната Романија, но не им оди во прилог победата на Шпанија. Во последното коло ќе мора да ја победат Црна Гора и притоа да се надеваат дека Русија ќе ја продолжи победничката серија и ќе слави над Шпанија. За потсетување, Шпанија и Шведска пред два дена одиграа нерешено 28:28.
Шведска - Романија 34:22
Последното коло во оваа група 2 се игра утре, а се среќаваат:
Шпанија - Русија
Романија - Јапонија
Црна Гора - Шведска
Табела:
1. Русија 8
2. Шпанија 7
3. Шведска 5
4. Црна Гора 4
5. Јапонија 0
6. Романија 0