Вашингтон, 3 декември 2019 (МИА) – Истражувачкиот центар Adobe Analutics објави резултати од малопродажните предбожиќни распродажби во САД на Cyber Monday, 2 декември. За време на вчерашниот ден продажбите на мало во земјата достигнале рекордна сума од 9,4 милијарди долари, или 19,7 отсто повеќе од лани.
Првиот работен понеделник во САД меѓу маркетолозите и ритејлерите веќе со години е познат и како Cyber Monday. Таквиот назив доаѓа од фактот што Американците кои се враќаат на работа по продолжениот викенд за Денот на благодарноста, порачките ги прават онлајн од своите работни места.
Онлајн продажбата во САД постои веќе трета деценија и компаниите за продажба на мало нудат попусти не само на Black Friday туку и за време на викендот, но и активно нудат стоки на попуст преку интернет. Продажбите на Black Friday секоја година се намалуваат, додека продажбите во останатите денови, вклучително и онлајн, се зголемуваат.
Годинава е постигнат и нов рекорд, односно 36 отсто од интернет продажбите на Cyber Monday биле извршени на мобилниот интернет, со паметни телефони. Овие продажби достигнале три милијарди долари. На прво место се персоналните компјутери преку кои биле извршени 59 отсто од продажбите, а на трето се таблетите со кои Американците извршиле 5 отсто од вкупните продажби за време на Cyber Monday.