Бројот на загинатите во самоубиствениот бомбашки напад во авганистанската престолнина Кабул се искачи на 61, а уште 207 луѓе се ранети, соопштија властите во врска со нападот врз протесниот собир на шиитското малцинство Хазари, додека талибаните негираат дека имаат поврзаност со оваа експлозија.
Силна експлозија одекнала при минувањето на поворката на шиитското малцинство Хазари, за кои се проценува дека во Авганистан ги имаа околу 22 отсто до вкупното население, во Кабул, кои протестираат против рутата на планираниот далновод, проект кој чини повеќе милиони долари, барајќи тој да биде насочен кон двете покраини каде главно живее хазарско население, што би придонело за нивен економски развој. Владата вели дека тоа ќе бара вложување на дополнителни милиони долари и оти ќе го одложи проектот за повеќе години.
На телевизиските снимки се прикажани мртви тела како лежат на улиците.
Мохамед Исмаил Кавуси, портпарол на министерството за здравство, објави дека се стравува оти бројот на жртвите и натаму ќе расте.
„Терористите влегле меѓу демонстрантите и ги активирале експлозиите кои убиле и раниле голем број наши сонародници, вклучително и припадници на безбедносните служби“, изјави авганистанскиот претседател Ашраф Гани, пренесе AFP.
Голем дел од центарот на Кабул беше затворен и поставени се барикади, во времето кога започна протесната поворка во саботата претпладнето, а биле преземени и силни безбедносни мерки.
Според телевизијата Tolo, нападот го извеле тројца бомбаши самоубијци, кои според полициски извори се измешале со демонстрантите. Експлозивната направа кај вториот бомбаш не се активирала, додека третиот терорист бил убиен од полицајците.
Овој напад дојде три седмици откако загинаа десетици луѓе и полициски кадети, во напад за кој одговорноста ја преземаа авганистанските талибани. Меѓутоа, овој пат тие негираат дека се вмешани во нападот во Кабул.
Портпаролот на талибаните, Забиула Муџахид рекол дека тие „не се вмешани, ниту имаат некаква врска со овој трагичен напад“. Според него, нападот го извршиле „непријателски кругови“.
Во меѓувреме агенцијата Reuters објави дека одговорноста за терористичкиот напад врз Хазарите, го преземала екстремната сунитска организација Исламска држава. Таа последните години силно се етаблира во некои делови од Авганистан, а шиитите ги смета за еретици и се едни од нејзините најчести цели.