„Најавениот ребаланс на буџетот е погубен за Македонија, за економијата и за граѓаните“, реагира опозициската СДСМ на предлогот за ребаланс на буџет на Македонија којшто беше најавен вчера вечерта.
„Новиот почетник министер за финансии, Кирил Миноски очигледно се нафатил да го спасува својот шеф Никола Груевски штом изјави дека со ребалансот планира да крати кај капиталните инвестиции, а истовремено со тоа да го зголемува буџетскиот дефицит. Кирил Миноски нека ја прочита веб страницата на Министерството за финансии за да види дека капиталните инвестиции од почетокот на оваа година имаат катастрофална реализација од само 16 отсто и се за 20 милиони евра помали во однос на минатата година. Ваквото кратење на капиталните инвестиции и зголемувањето на референтната каматна стапка од страна на гувернерот Богов ја водат економијата во ризик од рецесија и раст помал од 1 отсто. Тоа значи дека ќе имаме и историски највисоко ниво на буџетски дефицит од 4,3 отсто. Единствената цел на новиот ребаланс на Буџетот е создавање на услови и атмосфера за ново задолжување преку еврообврзница. Миноски треба да знае дека тој сноси директна одговорност со ставањето на сопствениот потпис за ново огромно задолжување на граѓаните и не треба да го слуша слепо Никола Груевски“, се вели во реакцијата на СДСМ.