Од опозицискиот СДСМ обвинуваат дека не им бил дозволен целосен увид во Избирачкиот список во подрачната единица на Државната изборна комисија во Центар. Им било дозволено само индивидуално да се провери, со конкретен матичен број и податоци за одредена личност.
Пратеникот на СДСМ, Стефан Богоев кој требаше да направи увид вели дека се прават обиди за да се сокрие хаосот што се случува во Избирачкиот список.
„И по вчерашната седница на ДИК, избирачкиот список останува полн со фантомски гласачи, останува полн со недоследности, со нецелосни документации и податоци за граѓаните. Имаме и дел конкретни податоци кои што велат дека 139.438 граѓани се без адреса, односно без валидна лична карта, а се останати во избирачкиот список. 18.269 лица коишто воопшто не им се пронајдени апликациите, односно барањата за лични карти во МВР, исто така се останати во избирачкиот список. 5.420 гласачи од Пустец, се уште по наши информации од Државната изборна комисија се останати во избирачкиот список. Сето ова е уште една потврда дека еден од клучните услови за фер и регуларни избори не е исполнет, односно избирачкиот список воопшто не е прочистен“, изјави Богов.
Тој уште еднаш повтори дека единствено, прочистен избирачки список, фер регулација кај медиумите и одвојување на партијата од државата, се услови за да се овозможат фер и регуларни избори.
Државната изборна комисија вчера вечерта го усвои извештајот од вкрстените, теренските и административните проверки на избирачкиот список.