Опозициската СДСМ обвинува дека власта полека, но сигурно го уништува најстариот универзитет во Македонија „Св. Кирил и Методиј“, преку неправилности при избор на ректор, како и со формирањето на нов универзитет „Дамјан Груев“.
„Целта на власта е ако може да го уништи најстариот, најдобриот универзитет во земјата „Св. Кирил и Методиј“. Прво, начинот и процедурата за избор на нов ректор на универзитетот „Св. Кирил и Методиј“ покажа дека власта сака да се меша во работите на најстариот универзитет во земјата“, обвини Петар Атанасов од СДСМ.
Тој појасни дека според техничкиот дел од гласањето нов ректор е професорот Никола Јанкуловски, но дека не може да се добројат сите нерегуларности и недемократскиот амбиент во кој се избираше новиот ректор.
Атанасов праша зошто ректорот Јанкуловски не се појави на јавна дебата, на академска расправа.
„Шверцерското враќање на Законот за основање на универзитетот „Дамјан Груев“ во Собранието е уште една тула во ѕидот што власта сака да го изгради околу УКИМ. Власта повторно го брани единствено партискиот интерес со ставање на законот на седница кога опозицијата е надвор од Собранието. Нема дебата, нема аргументи, има само партиска наредба и партиски интерес“, рече Атанасов.
Појасни дека СДСМ ги искажа сите свои аргументи за овој предлог закон со поднесување близу илјада амандмани, а академската јавност ги искажа своите сериозни критики.
„На Република Македонија не ѝ е потребен уште еден партиски универзитет, на штета на финансирањето на другите државни универзитети“, рече Атанасов.