За жал на сите навивачи на Бразил и саудискиот Ал Хилал, се потврдија најцрните прогнози во врска со повредата на Нејмар.
Бразил во квалификациите за Мундијалот 2026 загуби од Уругвај со 2:0, а натпреварот го одбележа повредата на Нејмар.
По еден дуел со Николас де ла Крус, Нејмар лошо нагази со левата нога по што остана да лежи на тревата. Потоа на носилки и во солзи беше изнесен од теренот.
Првите информации говореа дека Нејмар заработил повреда на коленото, но сите се надеваа дека станува збор за полесна повреда. Сепак, Ал Хилал доцна синоќа објави дека лекарските прегледи откриле дека Бразилецот ги скинал предните вкрстени лигаменти и менискусот на коленото.
Со оглед на тоа што се работи за една од најлошите повреди што може да ги добие еден фудбалер, значи дека оваа сезона за него дефинитивно е завршена.
Нејмар наскоро ќе биде опериран, објави Ал Хилал.
