„Најмалку 700 мигранти настрадале во последната седмица во водите на Средоземното Море на мигрантската рута од Африка до Италија“, соопшти високиот комесаријат за бегалци на Обединетите нации (УНХЦР).
„Бројот на жртвите се однесува на три несреќи случени во средата, четвртокот и во петокот, и се заснова на податоци добиени од преживеаните“, соопшти портпаролката на УНХЦР во Рим, Карлота Сами.
Таа прецизираше дека е пријавено исчезнување на 550 луѓе од брод кој се превртил во четвртокот, околу 100 можеби потонале на друг брод кој потонал во средата и неодреден број на трето пловило кое потонало пред два дена.
„Според овие страшни бројки, проценуваме дека има најмалку 700 жртви, но не сме сигурни во нивната бројка и нивните идентитети“, изјави портпаролката.
Во изминатите седум дена околу 1.700 мигранти пристигнаа на италијанските брегови, според податоците на Меѓународната организација за миграции (IOM). По затворањето на балканската рута низ Грција и Турција, Италија стана главната порта за мигрантите кои доаѓаат во Европа. Според податоците на IOM, во Грција влегле 272 лица во периодот меѓу 19 и 26 мај, додека во Италија биле регистрирани 5.674 луѓе.
