Обезбедувањето на Уставниот суд не им дозволи на новинарите да влезат во Судот и да ја следат седницата на којашто се одлучува за укинување на измените на Законот за помилување донесени во 2009 година, со што на Претседателот на државата ќе му се овозможи да помилува лица осудени за изборни нерегуларности, педофили, како и лица осудени за дела против човечноста.
Иако седниците на Уставниот суд досега беа јавни и новинарите ги следеа, освен гласањето на судиите кое е тајно, оваа седница е затворена за јавноста.
Новинарите побараа писмена одлука и образложение зошто седницата на Судот е затворена за јавноста, но од Судот нема никаков одговор.
Пред Уставниот суд останаа само контрадемонстрантите кои ги организираше лидерот на ГРОМ и градоначалник на скопската општина, Карпош, Стевче Јакимовски, за како што рекоа, „да го бранат Уставниот суд“.
Утрово пред Судот имаше големо присуство на полицијата, а бројот на контрадемонстранти сè повеќе се зголемува. Постојано доаѓаат луѓе од цела Македонија, за како што велат да го бранат „уставниот поредок“. Сите тврдат дека дошле по своја волја и дека не се од ниту една партија.
Дел од жителите на зградата „Ибни Пајко“ којашто се наоѓа во близина на зградата на Уставниот суд се жалат дека демонстрантите вршат нужда кај зградата, дека не им се обезбедени тоалети и дека се шират зарази.
„Кај да ги носам тука да поминат внучињата од градинка. Секаде мократ тука, немаат тоалети“, вели жена која живее во зградата.
Засега нема најави дали граѓанската платформа „Ајде“ ќе има протести и до кога пред Судот ќе има шатори и контрадемонстранти.
