Семејството на починатиот американски студент Ото Вармбир бара од САД како оштета за смртта на синот да им го дадат запленетиот севернокорејски брод.
Адвокатот на семејството, Бен Хач соопшти дека барањето за преземање на севернокорејскиот брод е предадено на судот во Њујорк. Потсетувајќи дека Ото почина кратко по неговото ослободување од Северна Кореја, каде мина една година во притвор, адвокатот рече дека без никакви сомнежи севернокорејските власти се одговорни за неговата смрт, а барањето за отштета е легално и легитимно.
Ото беше уапсен во текот на туристичка посета на Северна Кореја кон крајот на 2015 година. Во затворот неговото здравје се влоши, а на американските власти им беше испорачан во кома, во 2017 година. Почина кратко време по ослободувањето. Семејството тврди дека бил мачен.
Американските власти во април во Индонезија запленија севернокорејски товарен брод кој со извоз на јаглен ги прекрши санкциите. Семејството на починатиот студент бара како отштета за неговата смрт да им се предаде бродот тежок 17.000 тони.