Северна Кореја утрово истрела неидентификуван балистички проектил во морето на источниот дел од брегот на Корејскиот полуостров, а овој потег наиде на осуда од САД и Јапонија.
Иако севернокорејскиот лидер Ким Јонг ун за време на новогодишниот говор изјави дека неговата земја е блиску да тестира интерконтинентален балистички проектил, јужнокорејските извори сметаат дека сепак не станува збор за таков вид на оружје.
Во службеното соопштение поврзано со овој инцидент, Белата куќа објави дека очекувала севернокорејска „провокација“ многу брзо по стапувањето на должност на новата администрација.
Јапонскиот премиер Шинзо Абе, кој се наоѓа во официјална посета на САД, по примањето на веста одржа заедничка прес конференција со американскиот претседател Доналд Трамп во Палм Бич, каде одиграа партија голф. Абе истрелувањето на проектилот го нарече „целосно неприфатливо“, а поддршка му пружи и американскиот претседател.
Од американското Министерство за одбрана наведоа дека севернокорејскиот проектил бил од „среден дострел“.
