Северна Кореја изведе успешен тест на новиот ракетен мотор со кој планира да лансира сателити, објавија државните медиуми. Лидерот на државата Ким Јонг Ун наредил научниците и инженерите да се подготват за лансирање на сателитот колку што е можно побрзо.
Во меѓувреме САД и Кина договорија соработка во рамикте на која заеднички ќе се ангажираат околу нуклеарните тестови на диктатурата. Подземниот тест објавен претходно овој месец, беше најуспешен на сите времиња во оваа земја.
Кина е главен партнер и сојузник на Северна Кореја, но и оваа земја е се помалку толерантна кон воените потези и агресивната реторика на Ким Јонг Ун.
Претпоставките се дека новиот ракетен мотор ќе им овозможи на севернокорејците лансирање на различни сателити, меѓу кои и оние за надгледување на Земјата.
Пјонгјанг најавува дека наскоро ќе лансира нова ракета со долг домет, а постојано тврди дека сопствената вселенска програма ја развива исклучиво во научни цели. Од друга страна, САД, Јапонија и Јужна Кореја се сомневаат дека Северна Кореја развива интерконтинентален балистички проектил.