Севернокорејски војник пребега во Јужна Кореја, успевајќи да мине преку една од најдобро чуваните и утврдени граници на светот.
Војникот ја минал воената линија на разграничување која минува низ демилитаризираната зона која ја делат двете Кореи, кои технички сè уште се во војна откако судирот кој траеше од 1950 до 1953 година заврши со примирје, но не и со склучување мировен договор.
Секоја година просечно илјада жители на Северна Кореја пребегнуваат во Јужна Кореја, но повеќето од нив тоа го прават преку Куни.
Во овој случај необично е што еден жител на Северна Кореја успеал да ја мине воената линија на разграничување оградена со бодликава жица и со многу војска од двете страни на границата. Последниот пат таквиот премин е регистриран во јуни 2015 година.
Јужнокорејските воени функционери соопштија дека севернокорејскиот војник бил невооружен и дека немало пукање на границата.
Неговото бегство следеше по низата бегства на влијателни поединци што ја разлути комунистичката власт во Пјонгјанг, во периодот на засилени меѓународни тензии во регионот поради зачестените нуклеарни и ракетни тестирања од страна на Северна Кореја.
Едно од најпознатите бегства е на Тае Јонг Хо, заменик на севернокорејскиот амбасадор во Велика Британија. Тој е највисоко рангираниот дипломат кој во Јужна Кореја пристигна во август, задавајќи му непријатен удар на севернокорејскиот челник Ким Џонг Ун.