Поранешниот шпански репрезентативец Шаби Алонсо ги потврди шпекулациите дека ја игра последната сезона во богатата фудбалска кариера.
Шаби Алонсо, најавуваше уште од почетокот на годината дека ќе се пензионира, а во четвртокот, на Твитер потврди дека ова е неговата последна сезона како активен фудбалер.
„Те живеев. Те сакав. Збогум преубав спорту“.
Набргу на оваа социјална мрежа се огласи и претседателот на Баерн, Карл-Хајнц Румениге.
„Баерн сака да му се заблагодари на брилијантниот фудбалер кој совршено го следеше патот на Баерн на теренот и надвор од него. Шаби Алонсо е еден од фудбалските великани. Освоил се што можел да освои во кариерата. Над сѐ, тој е прекрасна личност, вистински фудбалски џентлмен“, напишал Румениге.
Кариерата, Алонсо, ја започна во 1999 година во Реал Сосиедад, по четири години во тимот од „Аноета“ се сели во Ливерпул, а во 2009 година, а сума од 30 милиони фунти го облече дресот на Реал. Пет години подоцна Пеп Гуардиола го донесе во Минхен.
Шаби Алонсо во кариерата има европска и светска титула со шпанската репрезентација, а Лигата на шампионите ја освоил со Ливерпул и Реал.
