Граѓанската иницијатива „Протестирам“ за вечерва најави протести пред Уставниот суд на Македонија. Ова е единаесетти по ред протест на граѓанската иницијатива.
„Протестираме и денес, гласно против режимот, здружено во целата наша шареноликост! Ако врне, понесете чадор и дојдете со нас! Во 18 часот се собираме на старо место, пред канцелариите на Специјалното јавно обвинителство, а потоа преку мостот Гоце Делчев маршираме до еден од симболите на неправда и корумпираност, Неуставниот суд“, се вели во најавата за протестот.
Вчера вечерта демонстрантите фрлаа боја врз зградата на Агенцијата за аудио и аудио-визуелни медиумски услуги и на Агенцијата за млади и спорт. „Шарената револуција“ започна по одлуката на Претседателот, Ѓорге Иванов да аболицира 56 политичари и нивни соработници.
