Генералното собрание на Обединетите нации го суспендираше правото на глас на Венецуела и на Либија, по вторпат во последните две годни, поради повеќемилионски долгови кон светската организација.
Според последните податоци, Венецуела мора да плати 24 милиони долари, а Либија 6,5 милиони долари.
Уште четири држави го загубија правото на глас, исто така поради долгови, а тоа се: Папуа Нова Гвинеја, Судан, Вануату и Зеленортската Република. Нивните долгови се движат меѓу 265.000 и 12.000 долари.
Според членот 19 од Повелбата на ОН, право на глас во Генералното собрание го губи државата којашто должи за членство за две или повеќе години. Исклучок се земјите за коишто може да се утврди дека долговите настанале поради околности на кои тие самите не можеле да влијаат. Како што е наведено, висината на партиципацијата за секоја членка се одредува врз основа на националните приходи на таа земја.