Последниот четвртфинален натпревар од Купот на Македонија заврши со минимална победа на Брегалница над Лабуништа.
Единствените две преостанати второлигашки екипи во Купот на Македонија одиграа натпревар под рефлектори на стадионот во Штип засенувајќи ги нивните прволигашки ривали. За разлика од калливите терени на кои од 13 часот играа прволигашите, теренот во Штип дозволи добра игра од двете страни.
Брегалница славеше минимална победа од 1:0 благодарение на голот на Мартин Стојанов шест минути после паузата. Убаво беше проигран во празно избегнувајќи офсајд замка на гостите и успешно го сопвлада голманот Филип Лазаревски.
Гостите од струшко не успеваа да ја пробијат цврстата штипска одбрана, а на другата страна штипјани можеа да постигнат уште некој гол, но не беа прецизни.
Реваншот во Струга, каде Лабуништа настапува како домаќин, ќе се игра на 4 март наредната година кога на програмата се и останатите три четвртфинални натпревари.
Стадион „Градски“ во Штип
Брегалница - Лабуништа 1:0 (0:0)
Стрелци: 51' Мартин Стојанов
Судија: Благојче Ралевски (Битола)
