Смирувањето со поранешните партнери не е ништо ново или спектакуларно, но некои жени спектакуларно си ги уништуваат шансите да се вратат во врска со саканиот со нивните постапки по раскинувањето.
Иако старата изрека вели „Скршеното се лепи, но пак се познаваат пукнатините“, ако веќе сте се решиле дека има причина за помирување и доволно љубов за да се обидете пак да ја обновите врската, овие работи нема да ви помогнат во тоа:
Безброј повици и пораки: Ако последните 10 повици и 200 пораки во инбокс (СМС, Messenger, Viber, WhatsApp) му се од вас, и да сака да се смирите ќе се почувствува загушено. Ако му треба простор, дајте му го. Ако и после паузата уште сакате да бидете заедно (и двајцата), тогаш чекањето вредело.
Опсесивно следење на социјални мрежи: Вниманието годи речиси секому, но ако се премине границата може да делувате како напорен манијак и ризикувате да го „задушите“ дечкото (нешто слично како во првата точка). Штедете ги лајковите и не го ставајте бившиот во Close Friends. Исто така не му коментирајте на секоја објава, посебно не со навраќање спомени од вашите среќни моменти заедно.
Случајни средби: Сите знаеме дека не се случајни. Вие знаете, тој знае, неговите другари знаат. Бевте заедно, знаете каде излегува, каде вежба, каде пие кафе... не се најдовте случајно во пилјарата кај него пред зграда, нели?
Испитување на пријателите: Ова не е војна, не мора да земате воени заробеници. Овие кутри луѓе не се виновни што вие си играте топло-ладно и не се должни да даваат извештаи за тоа кој колку е среќен/несреќен без другиот и каде планира да излегува и да оди на одмор.
Јавни исповеди: Никој не сака да ги знае деталите за вашата врска и причините зошто сте раскинале и зошто треба да бидете заедно засекогаш, а посебно не колешките на другарката, шанкерот каде што излегувате и луѓе во автобус. Вашата приказна е ваша работа и ако сакате да продолжи, чувајте си ја за себе.
