За легендарниот Франческо Тоти денешните фудбалери се како номади кои трчаат по пари. Фудбалерот кој целата кариера ја мина во Рома вака го коментираше потегот на Игуаин кој за 90 милиони евра се пресели од Наполи во Јувентус.
Тоти е еден од ретките фудбалери што никогаш во својата сениорска кариера не го смениле клубот. Тој е со Рома уште од 1992 година, а за клубот одиграл повеќе од 600 натпревари во Серија А. Иако освои само една титула, никогаш не размислувал за преселба во друг италијански клуб.
За разлика од него, најдобриот стрелец минатата сезона во Италија, за 90 милиони евра од Наполи се пресели во Јувентус. Со тоа го оствари најголемиот трансфер во Италија и третиот најголем во историјата на фудбалот. Игуаин ќе заработува 7,5 милиони евра годишно, а неговиот трансфер предизвика реакции и од навивачите на Наполи и од фудбалската јавност во Италија.
„Играчите денеска се како номади, ги следат само парите, а не срцето. Веројатно тоа е разликата меѓу мене и останатите. Нема многу спортисти кои го следат своето срце. Бираат да одат таму каде што ќе победуваат или каде што повеќе ќе заработуваат. Да мислев на парите, ќе го напуштев клубот уште пред десет години. Кај мене се работи за страст, а не за парите“ - изјави Тоти.
„Извесен период мислев да заминам во САД, но срцето избра да останам во Рома. Што се однесува до Кина, таму воопшто не можам да се замислам. Мојот однос со Рома со текот на времето стана како брак“ - вели Тоти.
Тоти додаде и дека посакува во Италијанското првенство да е дозволено да има само по двајца странци во тимовите.
